MBATHI 194 - 170

 NDETO SYA NGAI (Lord thy word abideth) 1. Ndeto sya Ngai waitũ,  Nĩ sya kũtũtethya,  Nĩsyo syĩ na vinya,  Ĩkĩthukĩĩw’a vyũ.  2. Syĩ na thayũ nthĩnĩ Na matho nĩ maw’o,  Nĩtũtangĩĩawa,  Kwondũ wa ĩ ndeto.  3. Amaitha oĩ,  Makĩtũkungĩa,  Ndeto sya Ngai waitũ,  Nitũtethasya.  4. Ũla ũsyosete,  Ena mũyo wa w’o Ũtanu mũnene,  Na ũkiakisyo.  5. Ndeto syĩ ũtethyo Tũkĩkala thayũ Na syĩ na ũtethyo Tũkĩtaanĩsya.  (Amen)

 ASA, NEENA NAKWA (Speak, Lord in the silentness) 1. Asa neena nakwa,  Ngoonĩ yakwa yu,  Nĩvindĩty’e nĩw'e,  Wasya ũũ waku.  2. Ndeto syaku kwakwa Nĩsyo thayũ w’o,  Nĩ lĩu wa ĩtunĩ; Nĩathĩw’e ngoo.  3. Nĩnĩnenganĩte,  Ndi nakwa oyu; Ĩka nakwa tondũ We wendete tũ.  4. Mbony’a ngoonĩ yakwa,  Kwenda kwaku vyũ,  Nĩke na ngoo yonthe Ta kana kaku.  5. Nĩvo nĩĩanĩw’a Thayũ ũsu mweũ,  Nĩmanyĩsye angĩ Wovosyo waku.  (Amen)

 MBONY’A ŨVOO WA NGAI (Sing them over again to me) 1. Mbony'a ũvoo wa Ngai ĩngĩ,  Ũla ũvoo mũseo,  Nĩ kana nĩthwe na mũyo,  O na mũuo mwingĩ,  Wĩ na ũathimo mwingĩ,  Na nũtũmanyĩasya.  Ndeto sya Ngai syĩ na mũyo,  Ndeto sya Ngai nĩ sya ũsengy’a Ndeto sya Ngai mbanakvye,  Nĩsyo nendete yu.  2. Ndavya ũvoo wa Mũtangĩĩi,  Ũla we watũkwĩĩe.  Atwĩw'ĩthan'ye na Ngai vyũ,  Nĩwe watwovoisye,  Na kũtwĩw'ĩa tei.  3. Ndeto sya Ngai syĩ vinya Wa kũtũtethasya; Nĩtũkiakiasya yu,  Ndeto sya Ngai ndanu,  Nĩtũkwongelwa vinya,  Nĩtũũthingĩĩw’a nĩsyo.  (Amen)

 NDETO SYA NGAI SYĨ MŨYO (Father of mercies in thy world) 1. Ndeto sya Ngai syĩ na mũyo ikĩthukĩĩw’a; Nitũtethasya mũno mbee,  Tũtie naĩ sitũ.  Ĩĩ Ngai ndethya Nĩw'e ndeto syaku 2. Ndeto syaku asa waitũ,  Nĩ lĩu wa ngoo sitũ; Na nĩsyo manzĩ ma i ngoo Ma kũtũne thayũ.  3. Ndeto syaku Yesũ Klĩsto,  Nĩsyathayũũkisye,  Lasalo yĩla waĩ mũkw’ũ Auma ngunganĩ.  4. Ngoonĩ ĩla yĩna mathĩna Nĩnengawe mũuo,  Nĩyongelawa mũĩkĩĩo,  ĩmwĩkwatye Yesũ.  5. Ame Yesũ, Mũtangĩĩi,  Nenga vinya waku Nĩkalae nĩ mũlũmũ vyũ,  Ndĩkakusw’e nĩ naĩ.  6. Na yĩla ũkambĩnũkya Mũsyĩ kwaku ĩũlũ,  Nĩngakũtaĩa nesa mbee Na ngoo yakwa yonthe. (Amen)

 VE ŨVOO NENDAA KWĨW’A (There is a story sweet to hear) 1. Ve ũvoo nendaa kwĩw’a Nendaa kũtavany'a Nũnengae mũyo ngoonĩ,  Nĩ mũkũũ na nĩ mweũ.  Nĩ mũkũũ na nĩ mweũ Nĩ mũkũũ na nĩ mweũ Oyu nĩnĩsĩ vyũ Nĩ mũkũũ na nĩ mweũ 2. Ũndavasya mwana wa Ngai Aũmie ũsumbĩnĩ Nĩkana atũtangĩĩe Tũsumbĩke nake.  3. Nĩwakwie ngelanyonĩ,  Athĩna nũndũ wakwa,  Nĩkana ndangĩĩwe kwa naĩ,  Nose w'o kwa mumo wa Ngai.  4. Wendo mũnene ta ũsu,  Nũthasyo kwa onthe,  Mwĩaĩi nĩngwĩnyivya vyũ,  Nĩngwĩnengane vyũ.  (Amen)

 MWĨAĨI YESŨ NĨWE THAYŨ (I will pass over you) 1. Mwĩaĩi Yesũ nĩwe thayũ,  Ũla ũtathela,  Amathoie a make kuma ũkombonĩ.  Ndeto syake mbanakavye Nĩsyo ikekala Na nthakame yake Yesũ,  Nĩyambovoisye 2. Yesũ nĩ kalondu ka Ngai,  Kala kathembiwe,  Nĩweanĩisye watho,  Akw’a vandũ vaitũ.  3. Anthũmũsya mũio wa naĩ,  Na ambĩwĩie tei,  Nthakame ya mwana waku Nĩyambovoisye.  4. Ũthatu wa Yeova Ngai,  Ũla wanthatĩe,  Nthakame ya mwana wake,  Nĩyambovoisye.  5. Ala mamwĩtĩkĩlile,  Matĩkasilĩlwa,  Mathambĩtwe nthakamenĩ,  Na nĩ atheu vyu.  (Amen)

 NA MWĨAĨI EKYA NDETO NGOONĨ (I will) 1. Na Mwĩaĩi ekya ndeto ngoonĩ,  Ya vinya na ũthasyo,  Nayu Mwĩaĩi mũvaka nĩnyuve,  Kana nĩ ngũkwosa.  Nĩndonya, nĩndonya, nĩndonya Ngai ndethya nĩthĩwe nĩ waku,  Nthakame yaku nĩyanthooie.  Ngeethwa w'o nĩ waku .  2. Kwa mũuo mumo waku ũmbose,  Yu kwa wendo ngoonĩ,  Mwĩaĩi nĩngwĩtĩkĩla nyie vyũ,  Ngakũĩkĩĩa weka.  3. Mwĩaĩi nĩwĩsĩ kana nĩ mwonzu Nũndũ nĩkĩa mĩisyo Na vinya wa ũthũkũmi waku Nenga Vinya waku 4. Nayu Mwĩaĩi tũnenge ithyĩ aa,  Mũuo wa ũtwĩanĩa Na kuma ngoonĩ twine na ũtanu Ngaina nĩ wa Yesũ (Amen)

 NDAVYA ŨVOO WA YESŨ (Tell me the old old story) 1. Ndavya ũvoo wa Yesũ,  Ũndũ watũkw'ĩĩe,  Ũvoo nĩwookie kũũ nthĩ Nĩwaumie kwa Ngai,  Ndavya i ndeto nesa,  Ta ũũtavya kana tũ Nakwa nĩ mũndũ mũthũku ,  Nĩngwenda kwĩw'a yu.  Ndavya ũvoo wa Yesũ ndavya ũvoo wa Yesũ ndavya ũvoo wa Yesũ ũla ũmbendete 2. Ndavya ũvoo kavola Kenda nĩmanye vyũ,  Ũvoo wa wovosya wa andũ Maume mothũkunĩ.  Ndavya ũvoo kaingĩ,  Satani ndakambate,  Nĩlilikane ndeto ii,  Yesũ nĩ Mũndangĩĩi.  3. Ndavya ũvoo na wendo,  Nĩ vata naw'o yu; Kwondũ wa wathe wakwa nyie,  Ngai atũmie Yesũ,  Nake alekya thayũ,  Aikua naĩ syakwa Ũseo wake wĩthĩwe,  Ũitalwa wakwa.  (Amen)

 NDETO YA YESŨ NOYO (Just a word for Jesus) 1. Ndeto ya Yesũ noyo.  Yakũtũtangĩĩa,  Ũka ũmanyĩw'e yu,  Nũndũ noyo thayũ.  Ndeto ya Yesũ noyo Ĩla ĩkatũtethya,  Ndeto ĩmwe ya Yesũ,  Neena, ina, voya.  2. Ndeto ya Yesũ noyo,  Ĩnenganae thayũ,  Myose yu ve ũthei,  Ndũkalewe nĩwe.  3. Ndeto ya Yesũ noyo,  Ĩtangĩĩa onthe,  Ndĩkasye mwanya ũũ yu,  Ndũkese kwĩlila.  4. Ndeto ya Yesũ noyo,  Lĩu kwa mũndũ mwonzu Ũkĩla ũleelunĩ,  Yesũ akũtethye.  (Amen)

 MWAMBĨLĨLYO NGAI NĨWOOMBĨE (Cling to the bible) 1. Mwambĩlĩlyo Ngai nĩwoombie ,  Ĩtu na nthĩ e weka,  Ĩtu na nthĩ na syĩndũ syonthe Ngai nĩwe waitwĩkĩthisye.  Ĩndĩ Ngai ombie Atamu,  Aitethya wĩa na moko make,  Onanisye amwenda Atamu,  Mbee wa syonthe ila woombie.  2. Ngai nĩwombie syĩndũ syonthe,  O ta kĩw’ũ na nthĩ na ĩtu,  Nĩ kana ithyĩ syana sya atamu,  Twĩthĩwe na vandũ va wĩkalo.  Kwenda kwa Ngai nthĩnĩ wa Atamu,  Nĩ Atamu ethĩwe mwĩanĩu,  Athaithe Ngai na kũmwenda,  Mĩthenya yonthe ya thayũ wake.   3. Ĩndĩ Atamu aimũlea Ngai Ethĩwa mũndũ wa kwĩka naĩ,  O na ithyĩ syana sya Atamu,  Twĩkalĩte o tũyĩka naĩ Ĩndĩ wenda kũumbũla naĩ,  Na kũitia ũkathambwa; Nĩ nthakame ya Mwĩaĩi Yesũ,  Ĩla yetĩkie ngelanyonĩ.  (Amen)

 VEVA WA NGAĨ MŨTHEŨ (Breathe on me, breathe of God) 1. Veva wa Ngai mũtheu,  ũtũmenethye naĩ Nĩmwende Mwĩaĩi ũnd’ũmbendaa,  Angw'ĩĩe mũtĩnĩ.  2. Veva wa Ngai mũtheu Ũtũmenethye naĩ,  Mũvaka kwonthe kũũ kwitũ Kũtwĩke kũũ kwa Yesũ.  3. Veva wa Ngai mũtheu,  Wakany’e mwakĩ ngoo Nĩendanasye naku vyũ,  Na ndĩkeyumye vo.  4. Veva wa Ngai mũtheu,  Ũdw'ĩkĩthye mũnyiau,  Nĩlee mwene thayũ wakwa,  Nĩmũvikĩle Ngai.  5. Veva wa Ngai mũtheũ Ũmbĩkĩĩthye saii,  Na ngwĩthukĩĩsye nĩkalae Ndikakwĩw'ĩthye woo.  6. Veva wa Ngai mũtheu,  Ũtusũe ithyĩ Twĩthwe na thay’ũtathela,  Kwondũ wa tei wa Ngai.  (Amen)

 MWOVOSYA WAITŨ AKĨTWAWA (Our blessed redeemer) 1. Mwovosya waitũ Yesũ,  Akĩtwawa ĩũlũ,  Nĩwatũnengie watho,  Veva mũtheu.  2. Nake ũsu nĩwokie,  Tondũ wathaniwe,  Kana eth'we na ũkũsĩ Veva mũtheu.  3. Nĩtwĩkalaa katĩ waitũ Kũtũmanyĩsya vyũ,  Kũtwonasya wendo wa Ngai Na wa Yesũ 4. Kawasya kake nĩtwĩw’aa Ngoonĩ sitũ nthĩnĩ,  Akĩkanya na akĩtethya,  Na kũtũtaa.  5. Ũtethyo wake w'onthe twĩ naw’o Kũmĩĩsya mathĩna,  Na vinya tũkĩemwa vyũ,  Nũtwĩkĩaa.  6. Tũkathei Ngai wĩ ĩũlũ,  Na Yesũ Mũtangĩĩi; Veva ũtwĩkĩe kũũ kwitũ Tũmũkatheĩ.  (Amen)

 VEVA WA NGAĨ TWĨKŨTAĨA (Old time power) 1. Veva wa Ngai twĩkũtaĩa Nũndũ wa wendo waku.  Nue ũla wĩtĩkĩlaa,  Kwĩkalaa ngoonĩ sitũ Veva wa Ngai mũtheu,  Usũsye ngoo sitũ Na wendo waku yu Twĩ vaa oyu 2. Veva wa Ngai nĩtumbũlaa Naĩ na kũkwĩw'ĩthya woo,  Yĩla ũtananengwa mwanya,  Wa ũtũsumbĩka ngoo.   3. Veva wa Ngai, twĩkũvoya,  Ũtũekee naĩ sitũ,  Twon'ye naĩ ĩtũthũkasya,  Tũsyumbũle syonthe vyũ.  (Amen)

 VEVA WA NGAI, TŨATHIME (God fills the soul that it may pour) 1. Veva wa Ngai taũthime Twĩthĩwe na vinya waku,  Tũtonye kũthaitha Ngai,  Na kũmwendeesya mũno 2. Tũnenge ũthangaau waku,  Na wendo waku, ithyonthe,  Twĩw’e ndeto sya Ngai nesa,  Tũmwĩtĩkĩle Mwĩaĩi 3. Tũtethye tume naĩnĩ,  Twĩthĩwe twĩ alũngalu,  Ĩkĩa vinya ngoo mbonzu,  Nĩ kana syĩkale nesa.  4. Oyu ũmũseũvĩsye,  Yesũ endwa ala make,  We ta mbua, twololosye,  Ngoo sitũ nĩ nyũmũ mũno.  5. We mavĩndũkye andũ yu,  Moke ngelany'onĩ yake,  Maekewe mavĩtyo moo,  Mamũkathe mũtũtangĩĩi.  (Amen)

 VEVA MŨTHEŨ WA MWĨAĨI (Thy holy spirit, lord alone) 1. Veva mũtheu wa Mwĩaĩi,  Ũthyũũe ngoo sitũ Vinya waku nũtonya vyũ,  Kũthesya ngoo sitũ,  Ĩĩ, ame veva mũtheu,  Ĩkala naitũ,  Ũtũthesye, nĩtweteleete,  Tusũwe nĩ vinya.  2. veva mũtheu wa Mwĩaĩi,  Ũtwongele vinya Vinya waku nthĩnĩ wa ngoo,  Woneke nthĩ yonthe.  3. Veva mũtheu wa Mwĩaĩi,  ĩyonanye kwitũ Na wasya wa ndeto syaku Ũsinde satanĩ.  4. Veva mũtheu wa Ngai Twĩ vata naku yu,  Ũũ nĩw'o ithyĩ tweteele,  Ũthesye ngoo sitũ.  (Amen)

 AME MŨTANGĨĨI (Send the fire) 1. Ame mũtangĩĩi we ũtheasya Mwaki wakũ tũetee,  Mũthĩnzĩo waku ũtwonoesye,  Mwaki wakũ ũtũetee,  Ũtusũsye na veva mũtheu,  Tusũwe ithyonthe nĩ vinya waku,  Mwaki waku tũetee.  2. Wasũngĩie Eliya tene Mwaki waku ũtũetee,  Ũtwĩthukĩĩsye ame yeova,  Mwaki waku tũetee,  Ũthũku witũ ũvũvw’e wonthe Na kyeni kyaku kĩkene kw’onthe.  Nĩ kyambĩlĩlye na ithyonthe Mwaki waku tũetee.  3. Twĩenda mwaki nĩtũkwĩsũva,  Mwaki waku tũetee,  Tũtikethĩwa na mawendi maitũ,  Mwaki waku tũetee,  Twĩkae maũndũ ma ũlũngalu,  Natwĩvathane na maũndũ ma nthĩ,  Mwĩkalo witũ wĩthĩwe mũseo,  Mwaki waku tũetee.  (Amen)

 AME VEVA WA ĨTUNĨ,  (Spirit divine attend our prayers) 1. Ame veva wa ĩtunĩ,  Ũka kwitũ oyu,  Ũseũvye wĩkalo waku,  Nthĩnĩ wa ĩkanisa 2. We ta kyeni ũmulĩke,  Maũthũku maitũ Tũtongoesye nzĩanĩ,  Sya ũlũngalu waku.  3. Ũka ta mwaki ũvĩvye,  Naĩ sitũ syĩthwe nthembo Kwa mũtũtangĩĩi.  4. Nue ĩmwe ya ũathimo,  Tũathime oyu,  Nĩkana ngoo ĩla nyũmũ,  Yĩthwe na ũathimo.  5. Theea ĩkanisa kũũ nthĩ,  Yĩathimĩke vyũ,  Otondũ kũya ĩtunĩ,  Kũathimĩkĩte.  (Amen)

 TAVANYAI KŨŨ (The comforter has come) 1. Tavan’yai kũũ kwonthe,  O mbaĩnĩ syonthe: O andũnĩ onthe o kwa kĩla ũmwe,  Ala mwathaiw’e tavan’yai mwasye Veva nĩwokie.  Nake Veva Mũtheu nĩwookie kũũ nthĩ,  Kuma kũu ĩtunĩ tondũ kwathanĩtwe,  Tavanyai kũũ kwonthe o kwa kĩla ũmwe; Veva nĩwookie.  2. Kwaĩ kĩĩo o kĩnene o na w’ia mwingĩ; ũtukũ ũmwe kũikya kwĩ kũtheu,  Kyeva na kĩmako nĩsyathelile vyũ: Yĩla we wookie.  3. Nake nĩ mũiti wa ngoo ila mbonzũ,  Wa ngoo i syovetwe nũtonya kwithasya Kwa ũu nĩ tũtonya kwina na ndaĩa,  Veva nĩwookie.  4. Nake nĩwookie nĩ kana onan’ye,  Wendo wa Ngai asa kwa ala mamwosete; Kwaũũ nĩtũkwona wendo wa Ngai Asa,  Veva nĩwookie.  (Amen)

 YESŨ NĨ MŨNYANYA WAKWA (What a friend we have in Jesus) 1. Yesũ nĩ mũnyanya wakwa Nakwa nĩ mũnyanyae,  Kĩla saa nĩtũendanasya,  Nyie na ũla Mũtangĩĩi.  Myũnthĩ yonthe we nũmbĩkaa Nesa mũno na ĩnee,  Nakwa nĩngũmwĩthukĩĩsya.  Ngĩkala vamwe nake.  2. Nyie na Yesũ, Mwĩaĩi wakwa,  Nĩtwatumie ndũũ: N’oyu nĩtũvotanĩte,  ĩĩ, twĩ na mũamba wa ngoo.  Mĩio yakwa we nũmbaũaa,  Na nũndaanĩsyaa na woo; Ambona nyie nĩ mũvinyu,  Nĩ w’o, nũnũũmbuũkya ngoo.  3. Yesũ e vakuvĩ nakwa,  Kũla ngũthi, kĩla saa.  Nzĩa ya w’o we nũmbathaa,  Nake nũndongoesyaa Na ngĩkala kĩvindunĩ,  Ndeto syake nĩsyo taa; Ngĩlingĩlwa nĩ matatwa,  ũndũ wake ndiemwa.  (Amen)

 GOONĨ YAKWA NĨVO VE MŨYO (i am so glad that our father in heaven) 1. Ngoonĩ Ĩ yakwa nĩvo ve mũyo,  Nĩkwĩthwa Ngai nũmbonete ũvoo Nĩwaandĩkie ndetonĩ syake,  Ũvoo wa wendo wa mwana wake.  Yesũ e wendo mũnene vyũ,  Nĩwambendaa, na nũmbendaa,  Yesũ e wendo mũnene vyũ Na nũmbendete nyie.  2. Ti atĩ nyie nĩnamwendaa Yesũ,  Aiee, kũũ nthĩ vati wendo ta ũũ,  Yĩla nekalĩte mawathenĩ,  Nĩw’o Yesũ nĩwambendie nyie.   3. Eth’wa nĩngũtia nzĩa yake,  Ndakolwa ninyĩe nũmbendaa,  Nĩwe mũĩthi wakwa mũseo,  Na akandũnga nzĩanĩ yake.   4. Eth'wa ngolwa nĩ maũndũ onthe,  Yĩla ngavik’ũsumbĩnĩ wake,  Tene na tene nyie ngamanya ũũ: Nyie nĩnendetwe nĩ Mwĩaĩi Yesũ.  (Amen)

 ĨĨ MWĨAĨI YESŨ WAKW’IE (I ’m not ashamed to own my lord) 1. Ĩĩ Mwĩaĩi Yesũ wakwie,  Wovosye andũ vyũ,  Nthakame yakũ nĩtonya Kũnthesya ngoo yakwa.  Ĩĩ nĩw’o, ĩĩ nĩw'o , ngelany'onĩ ya Yesũ,  Naekewe wathe wakwa wonthe,  Nĩngũkwata na ngoo ndeto sya Yesũ,  Nakwa nĩngũtana na ngoo mũno.  2. Nĩngwenda ndeto ii sya Ngai,  Inzeũvye ngoo yakwa; Nĩmena kwĩka mawathe,  Membata ũvoo wa Ngai.  3. ĩĩ andũ onthe ĩw'ai ũũ,  Na mũlilikanei,  mwalea ndeto sya Yesũ Mũtikatangĩĩwa.  (Amen)

 KWAĨ MŨTHENYA WAĨ NA MŨYO (O happy day, that fixed my choice) 1. Kwaĩ mũthenya waĩ na mũyo,  Ũla namwosie Yesũ,  Mũtangĩĩi, na Ngai wakwa,  Andũ onthe ĩw'ai yu.  Ũtanu ĩĩ mũno, nĩndangĩĩwe,  Nĩ Yesũ yu,  Nũmanyĩasya kũvoya,  Nĩ mũtanu ngoonĩ yakwa,  Ũtanu, ĩĩ mũno, nĩndangĩĩwe Nĩ Yesũ yu.  2. Nĩngwenda angĩ mamanye ,  Ũtangĩĩo wa Ngai wakwa,  Yesũ akw'ĩĩe mũtĩnĩ Nĩ kana nyie nĩtangĩĩwe.  3. Ngoo yakwa nĩyusũĩte Ndaĩa na wendo wa Yesũ,  Yesũ nĩ Mwĩaĩi wakwa vyũ,  Ndĩnyuva nzĩa yakwa yu.  4. Ĩĩ, ndongoeasya, Ngai wakwa Ngakũvikĩla na mũyo: Mĩthenya yonthe nĩ thayũ Ngakũtaĩa, mũmbovosya.  (Amen)

 NĨ WAKU YESŨ (I am thine, o lord) 1. Nĩ waku Yesũ; wasya wakũ yu,  Nũmbonetye wendo waku.  Nĩngwenda mũno ngwĩtĩkĩle vyũ; Ngusya nũke vala ũĩ.  Yesũ ngusya nũke vala ũĩ,  Nĩmanye kĩkwũ kyaku,  Yesũ, ngusya nũke vakuvĩ naku,  Nũke ũtheunĩ waku.  2. Ũnenge vinya ndethasye wĩa Wa kũkũthũkũma Ngai,  Nĩkae o ũndu ũkwenda nĩkae,  Na ndũae ngwĩkwatĩtye.  3. Nĩngwĩw’a mũyo yĩla ngũvoya,  Yĩla nĩtulĩtye ndu,  Nũndũ yu nĩw’o ngũneena naku,  Nĩwĩw’e wasya waku.  4. Wendo waku nĩ mũnene mũno,  Na twavika ĩtunĩ Tũkatana vyũ, na kũkũtaĩa,  Tũkathũmũa ithyĩ.  (Amen)

 YESŨ NĨNGWENDETE (My Jesus I love thee) 1. Yesũ nĩngwendete, Mũtangĩĩi wakwa,  Mawendi mathũku ndimenda nongi,  We Mwovosya wakwa, nzũvĩa kwamo.  Ndĩkakengwe nĩmo, nĩ thayũ kũkũ nthĩ.  Ĩĩ, kwa wendo waku Ũnenge kũkĩlya mathũkũ onthe vyũ.  2. Yesũ wusũĩte nĩ wendo mũno,  Nũndũ wambendĩe, nĩ mwathe; Na nthakame yaku yanthesya nyie vyũ,  Na yuyu nĩngwenda kũkũvĩtũkya mbee.  3. Na yĩla wambiwe mũkelanyonĩ Nthakame yetĩka-nĩ nthembo kwakwa,  Na yũ ndi vata kũthemba ĩngĩ,  Nũndũ nthembo yakũ nĩmbĩanĩe vyũ.  4. Yesũ, watũkwĩĩe o ta mũndũ ngya,  Watiie ũsumbĩ na ĩthe waku,  Watheeie kũũ nthĩ ũthĩne ta mũndũ,  Nĩ kana naitũ twose ũthwii waku.  5. Wĩkalo mũseo nũseũvĩtye,  Wĩ kũya kwa Ngai mũsyĩnĩ mũnene Naw’o ũkekalaa ala atheũ ngoo,  Mendete kũthew’a nĩ veva mũtheu.   (Amen)

 NGELANYONĨ YA YESŨ KLĨSTO (in the cross of Christ I glory) 1. Ngelany'onĩ ya Yesũ Klĩsto,  Ngeekathĩĩa nyie mũno,  Nayo nthĩ nĩyambĩtwe kwakwa,  Na nĩnambĩtwe kwayo.  2. Nthembo nyingĩ nĩsyamanthiwe N’andũ onthe kũkũ nthĩ,  Nthembo ĩmwe yĩ na ũtonyi,  Nĩyo Yesũ, Mũtangĩĩi.  3. Mawoonĩ na mathĩnanĩ,  N’ũtanunĩ o naw’o,  Twĩ na wĩtĩkĩlo mũseo,  Ngelanyonĩ ya Yesũ.  4. Ngelanyonĩ ya Yesũ Klĩsto,  Nĩtwambĩtwe kwa Ĩ ĩnthĩ,  Thayũ witũ yu nĩ wa Yesũ,  Syũmbe nzaũ nĩsyo ithyĩ.  (Amen)